No comments
THU MASA
by Dr. Joannes Tual Khai M.B.B.S
(Ygn),
Founder of YCCF. Member of Ygn Yewai Cemetery Management
Board,
Member of SGED (Support group for Elderly Doctor-Ygn),
EC Member of Tedim Association-Ygn, President of YSI (Ygn
Suangpi Innkuan)
Pa Petru Am Ngin nuntakna thu ka gelh kipat pen kum (9) val ta ahih manin sawt mahmah ta hi. Ka kipatcil pen 18.10.2012 pek hi. Mi tung a kiphatsakna, kiletsakna leh gualtung tuannopna nei loin, Pasian tungah kipumpiak leh kiniamkhiatnate bulphuh in a kalsuanpa ahi hi. A nuntakna tangthu khat vei ka gelh khit ciangin ka vel kikik leh ka behlap ding thu leh la bei thei lo hi. Ka behlapnop lai thute pen zuau thu kihel lo a, thuman thutak vive ahi hi. Tu dong mah ka muhkhiat zawh loh ka behlap ding thu laigil tampi tak om lai hi.
Ka u Pa Petru Am ngin
nuntakna in: A mah leh A innkuanpihte, A nu leh A pa leh A sanggamte adingin
bek hi lo hi. Kawl gambup gam leh lei, khua leh tui adingin a sisan leh thazang
khat beek siit loin a kipumpiakin a zangkhiapa ahi hi.
A pa si dingin pattui a kitaak lai takin kumpi lam pan a tavuan thupi sakin a nasepna Nakzang, "Sukte Independent Army (SIA) Lavy Camp," ah a khuan ngah bei ta ahih manin a kuankhia teiteipa ahi hi. Ka sangkah lai in Americante President John F. Kennedy thu, Englandte Kumpi Margret Tacher thu, Mothher Theresa thu khawng ka sim ngei hi. Ka phaw mahmah khat ah, "How to Win Man and Influenced People," cih D. Carnetyi a gelh laibu Kawlgam Prime Miniter U Nu in tua laibu (googo) Kawllai tawh a tei pen ka sim ngei hi. Ka u pa nuntakna leh kalsuan zia pen tua laibu helhte muhdan tawh kibang ka sa mahmah hi. A naute, A tate, A tute leh A tusawnte in a nuntakna uh tawh etkak in, thei in nuntakpih in i kalsuanpih ding lunggulhna lianpi tawh Pa Petru Am Ngin a damlai in a nuntakna tangthu hong pulaak khia ka hi hi.
Sd/Dr. Joannes Tual Khai